بە دەرکردنی ئەو
ڕاگەیندراوە گشتییەی ئەمشەو 24/09/2017، بزووتنەوەی گۆڕان لە مێژووی هەڵوێستەکانیدا شکستێکی
گەورەی تۆمارکرد! ئەگەر ڕاستە ئەم بزووتنەوەیە خاوەنی 500 هەزار دەنگدەر و
پشتیوانی ڕاستینەی هەیە، ئەوا دەیتوانی پرۆسەی ڕیفراندۆمەکەی بارزانی بە پشتیوانی
تورکیا ڕاگرێت و تەنانەت لە توانایدا هەبوو لە ناوچەیەکی بەرفراواندا دەست بگرێت
بەسەر ناوەندەکانی دەنگداندا و بەشێکی گەورە لە جەماوەری یەکێتیش بهێنێتە ئەم
مەیدانەوە. بە داخەوە پێدەچێت ئەو 500 هەزارە، 500 کادری کارای تێدا نەمابێت، کە
بتوانن بە پێچەوانەی خواستەکانی دەسەڵاتەوە تەعبئەی جەماوەری بکەن و کردەی پیویست
درووست بکەن لە گۆڕەپانی سیاسیدا کە ببێتە گوشار و هۆکار بۆ گۆڕانکاری!
سادەترین ڕەخنە و
لاوازییەکانی ئەو ڕاگەیاندنە شێوەی زمان و دەربڕینەکانیتی، جگە لە چەند گلەییەکی
پاسیڤانە هیچی تری لێ نابینرێتەوە. بۆنمونە لە کۆتاییەکەیدا هەڵوێستەکەی ئەوەیە
خەڵك ئازادە چۆن بەشداری دەکات! ئەی گۆڕان خۆی چی؟ لایەنگرانی گۆڕان و ڕێکخستن و
ئۆرگانەکانی ئێوە چۆن بەشداری دەکەن؟ هەر وەك خەڵك؟ جا کەواتە بزووتنەوەی وا لە
دۆخێکی ئاوا هەستیاردا سوودی کوا، بەتایبەت کە خۆتان دژ بە سروشت و پرۆسەی
ڕێفەراندۆمەکەن؟ بۆ سەرکردایەتی و بۆ جڤاتە "نیشتمانییەکەتان" جارێ ئازادکردن
و نەکردنی خەڵك یەکەم ئیشی ئیوە نییە، دووهەم بە دەست ئێوە نییە و سێهەمیش هیچ
لەمەسەلەکە ناگۆڕێت؛ لەبەر دوو هۆکار.. یەکەم، پیویستە بیرتان بهێنینەوە خەڵک خۆی
ئازادە (بەڕێزان)، تا باشتر یادتانبێتەوە ئێمە لە سەردەمی بەعسیش بۆیکۆتی دەنگدانەکانیمان
دەکرد، هەر زۆر ناچاریش بکراینایە بە سپێتی بۆمان تێدەخستن. دووهەم، بە بەڵگەی
خاڵی یەکەم گوتارەکەتان حیکمەتی سیاسی لێ ونە، حیکمەتی بەتاڵ نەوتنی باشترە، کاتێک
خەڵك خۆی ئازاد بێت پێم ناڵێن ئەگەر ئێوە دەسەڵاتتان هەبێت چی لێ ئەکەن تا ئازادی
نەکەن؟ باوەڕم وابوو ئێوە وەک خۆتان دەڵێن بەو هەموو هێزەوە دەتانتوانی پرۆسەیەك بوەستێنن
کە دەزانن دەسەڵات ئاوا بەدفەڕانە و نا بەرپرسانە مامەڵەی لەگەڵ دەکات. بەتایبەت
کە ڕێفەراندۆم پرسێکی گرنگ و هەستیارە. بەڵام مەخابن دەرکەوت ئێوە جێ گلەییش
نەمابن نەك ڕەخنە!
ڕاگەیندراوەکەتان، ملدانێکی ئاشکرایە بە بێدەسەڵاتيتان، ئەمەش
ملدانە بە دەسەڵاتدارانی ستەمکاری هەرێم. بەداخەوە ناوەڕۆکی بەیاننامەکەتان پڕە لە
تەسلیم بوون و شەرمنی. من نازانم ئەمە بە ئامۆژگاری کام "ڕۆشنبیرە"
نووسیوتانە، یان کام "بیرمەندە" و کام داتا و ڕاستی ژمارەییەی لە
پشتەوەیە؟ پێدەچێت یان تاقەتی بەرهەڵستکاریتان نەمابێت، یان بەرژەوەندییەکانتان
ڕیگە نەدەن هەڵوێستی بەرهەڵستکارانەتان هەبێت. ئەگەر یەکەمیان ڕاستبێت، ئەوا
پێویستە گەنجانی ناو بزووتنەوەی گۆڕان هەڵوێستی جدی خۆیان وەربگرن و چیتر بە ئیوە
فریو نەخۆن. خۆ لەباری دووهەمیشیاندا، ئیتر پیویستە بە جۆرێک پێناسەبکرێنەوە و لە
قاڵب بدرێنەوە کە ئێوەش بخرێنەوە ناو چینە دیوارەکانی کە بوونتە بەربەست و ڕیزەکانی پارتی و یەکگرتوویان پێکهێناوە. مەخابن
بۆ خۆتان و ڕاگەیندراوەکەتان، سوپاس کە نەتان توانی تا کۆتایی بێدەنگ بن، هەر هیچ
نەبێت حیکمەتێکی تیا بوو!
