پەیامێك لە ١٩ ی دیسەمبەرەوە

پەیامێك لە ١٩ ی دیسەمبەرەوە

شێوەی سیاسەتکردن و کاربەڕێوەبردنی بنەماڵە حوکمڕان و خۆسەپێنەکان هۆکاری سەرەکی قەیرانە یەك لە دوایەك و شکستە ئابووری و نیشتمانییەکانی هەرێمی کوردستانن. سیاسەتەکانی تالانچێتی و خۆسەپاندن و نۆکەرایەتی بۆ داگیرکەران ئەم باندانەی دزیی و گەندەڵیی و تاوانکاریی کردوەتە سیستەمی سیاسی لە کوردستاندا و زەرەرمەندی یەکەمیش خەڵکی ڕەنجدەر و تێکۆشەری بازاڕەکانی کار و بێکارین. ئەوەی ڕۆژی ١٩ ی دیسەمبەر لە شارەکانی کوردستان بەڕێوەچوو، بەتایبەت ڕەشەکوژییەکانی شاری ڕانیەی تێکۆشەر و قوربانییەکانی شاری کۆیە و سەرکوتکردنەکانی تری شار و شارۆچکەکان، ئاماژەیەکی زەقن کە ئەم دەسەڵاتە ئامادەییە بۆ بەردەوامی خۆی پەنا بۆ هەموو جۆرەکانی بەدڕەوشتی توندوتیژی و تاوانکاری ببات. بەدبەختی کۆمەڵگای کوردستان لەوەدایە کەرەستەی توندوتیژی و تاوانەکانی ئەوانیش هەر ئەو خەڵکە بەشمەینەت و بێکارەن کە لە ڕێگای برسیکردن و بێ بازاڕکردنەوە لە چوارچیوەی هێزە چەکدارەکاندا تەجنیدکراون. دەسەڵاتی خۆسەپێنی هەرێم باش دەزانێت دەستبردن بۆ توندڕەوی و خوێنڕشتن ڕێگایەکە جگە لە توندوتیژی هیچی تری لێ سەوزنابێت، دڵنیاشە تاوانەکانی هێندە گەورە و زۆربوون چیتر خەڵکی ڕاپەڕیوی کوردستان ناتوانێت چاوپۆشی لێ بکات. بەردەوامی بەرەنگاری و پێداگری لەسەر داواکان تازە گەیشتونەتە جێگایەك پاشگەزبوونەوە لێی قامچی ستەمکاریی ئەوان ئەستوورتردەکات و ئێمەش ناچارین بەڕیگا جیاوازەکان بەردەوام بین تا دەگەینە سەرکەوتن.

ئێمە هەرگیز ئومیدەوار نین و نەبووین ململانێکانمان لەناوخۆی کوردستاندا بەم ڕۆژە بگات و نەتوانین لەڕیگای گەشەسەندنێکی سروشتییەوە لە ژیانێکی باشتر و حوکمڕانییەکی شارستانیانەتر نزیك ببینەوە، بەڵکو ئەوە شێوەی کاری سیاسی ئەوانە لە کوردستاندا ڕۆژ بە ڕۆژ ئێمەی بەرەو کەنارەکانی ڕاپەڕین بردوە و ناچارمان دەکات گورزی شۆڕشگێرانە لە هەڵاتوانی بەردەمی دوژمن بوەشێنین. ئێمە هەرگیز ئامانجمان نییە خەڵك ئاراستەی چارەنووسی مەرگ و قوربانیدان بکەین. خەباتی نوێی ئێمە دەخوازێت شانازی بەکەمی ژمارەی قوربانییەکانمانەوە بکەین نەك سەرخوێنکەوتنی شەقام و شارەکانی کوردستان، ئەوە شێوەی تێگەیشتنی خێڵ و باند و کەمینە گەندەخۆرەکانی دەسەڵاتە کە هەمیشە هیوایان بوە خوێن بەردەوام بڕژێت بۆ ئەوەی ئەوان لە قازانجی بەردەوامدا بژین. ئەوەی ئێمە ئەمڕۆ دەمانەوێت ئەوەیە؛ سیستەمی سیاسی و بەڕێوەبردنی کۆمەڵگا لە کوردستاندا بگۆڕین بە سیستەمێکی دادپەروەر و جیاوازی تر کە بتوانێت شکۆ بۆ هاونیشتمانی بگەڕێنێتەوە و حوکمڕانی خۆبەخۆی خەڵکی تیادا دابمەزرێت.

داواکاری دڵسۆزانەمان ئەوەیە، خەڵك لەسەر داواکانی بەردەوام بێت و بەوریایی دەست بۆ کەرەستەکانی ڕاپەڕین و بەرەنگاربوونەوە بەرن، ڕووکردنە لوولەی تفەنگ لەیەکتر بەرەی گەل و نیشتمان لاواز دەکات. خۆپاراستن و بەردەوامی هەر تاکێکی ڕاپەڕیو، کاروانی خەباتی ئێمە سەرکەوتووتر دەکات. داواکاری دڵسۆزانەمان ئەوەیە خەڵك بەوریایەوە خۆی بپارێزت و لە پێناو کەمکردنەوەی قوربانیداندا هەنگاوەکانی ڕاپەڕین زیرەکانەتر بەردەوامی پێ بدات. گفتوگۆ و هاوئاهەنگی لەگەڵ هەر ئەندامێکی هیزە چەکدارەکاندا بکەن و لەبری بەگژدا چوونی یەکتر هاوپەیمانی و لێبوردنیان لەگەڵدا درووست بکەن و هێزی یەکگرتووتان ئاراستەی سەرانی خیانەت و ستەمکاری بنەماڵە و باندە خۆسەپێنەکان بکەن. ئەشێ باوەڕتان وا بێت لەگەڵ چەکدارەکانی ئەو ڕژێمەدا هیچ شتێك سوودی نییە، بەڵام ئەوانیش بەشی هەرەزۆریان ڕۆڵەی ڕەنجدەر و تێکۆشەری ئەو کۆمەڵگایەن و دووجار قوربانی هەمان سیستەمن و ئەگەر وشە و گفتوگۆی ئێوە بەئەندازەی کەمتر تەقاندنی گوللـەیەکی ئەوانیش بێت، ئەوا سەرکەوتنێکی گەورەیە بۆ خەڵکی تێکۆشەر و ڕەنجدەر و ڕاپەڕیوی کوردستان.

داواکاری دڵسۆزانەمان ئەوەیە بۆ هەر هەنگاوێك چەندجارێك بیربکەنەوە و زۆر ژیارانە وزەو وتواناکانتان ئاراستەی ئامانجە سەرەکییەکان بکەن تا سەرکەوتنی ڕاپەڕین و گەڕانەوەی دەسەڵات بۆ خەڵك بەردەوامیتان بێت.

پەیامێك بۆ جەماوەری خۆپیشاندەر و ڕاپەڕیوی کوردستان

پەیامێك بۆ جەماوەری خۆپیشاندەر و ڕاپەڕیوی کوردستان

کە جام پڕ بوو لێی دەڕژێت! ئەمە ئەو مەنتیقەیە کە پێمان دەڵێت بزاوتنی هێزە جەماوەری و بەشمەینەتەکانی کۆمەڵگا مەرج نییە هەموو کات بەخواست و پلانی ئەو هۆشمەند و بیرمەندانە بەڕێ بکەوێت کە لە مێژوودا پلان بۆ شۆڕش و ڕاپەڕینەکانی دادەنێن. بزاوتنی خەڵکی کوردستان لە دەسەڵاتی ستەم و تاڵانی و کاولکاری، لە دەسەڵاتی باندو مافیاکانی خێڵ و بنەماڵەکان دەروازەیەکی تری بۆ نەماوەتەوە جگە لە ڕاماڵینی ئەو تاقمەی چەندین ساڵە بە فەرمان و قازانجی داگیرکەرانی کوردستان حوکمڕانی خەڵكەکەی دەکەن. ئەشێ سەرهەڵدانی خۆپیشاندان و ئەم دۆخەی ئەمڕۆش پیلان و دەستی هەندێ تاقم و حیزبی هاوشێوەی دەسەڵاتدارانی لە پشتەوە بێت، بەڵام هیشتا خەڵك دەتوانن، جێدەستی خۆیان لە خواست و ڕاپەڕین و بزاوتەکاندا دیاری بکەن.

بەشەرمەزارییەوە لە دەرەوەی کوردستانەوە ئەم دێڕانە ئاراستەی هاونیشتمانی و هاوڕێ و کەس و هاوبیر و خەڵکی ڕەنجدەری نیشتمانەکەم دەکەم. لایەنی کەم لەم دوورەوە ویژدانی خۆم بەوە ئاسوودە دەکەم چەند سەرنجێك لەم چەند دێڕەوە ڕەوانەی ئێوەی تێکۆشەر و بەشمەینەت بکەم:

یەکەم: ئەمڕۆ ئەرکی هێزی پێشمەرگەی ڕاستیینە ئەوەیە پارێزگاری لە سنوورەکانی کوردستان بکات و ئەرکی سەرشانی فەرماندە مەیدانییەکانیانە بەشێوەیەکی درووست ئاراستەی هێزەکانیان بکەن و بەرگری لە هەر هەڕەشە و مەترسییەکی دەرەکی بۆسەر کوردستان بکەن ، نەک بکەونە خزمەت ستەمکارانی کوردستانەوە بۆ سەرکوتی خەڵكی ڕاپەڕیو.

دووهەم: ئەمڕۆ ئەرکی سەرشانی پۆلیس و هێزەکانی ئاسایش پارێزگاریکردنە لە دامەزراوە گشتییەکان و ڕێخۆشکردنە بۆ خۆپیشاندەران تا بە کەمترین تێچوون بتوانن کوردستان لە مافیا و بنەماڵە خوێنڕێژ و دز و تاڵانچییەکانی کوردستان پاك بکەنەوە. ئەرکی سەرشانی تێکڕای ئەفسەر و پلەدارەکانە مل نەدەن بە بڕیارە داپڵۆسێنەرەکان و لەبەرامبەر سەرکوتی خەڵکدا ببنەوە بەو هێزە نیشتمانییەی پشتیوانی لە خەڵك دەکات، ئەوان ئەمڕۆ وەك دامەزراوەیەکی حوکمەتی جگە لە قەڵغانێك بۆ پارێزگاری لە ستەمکاری هیچ ڕۆڵێکی تر نابینن لە خزمەتی دەسەڵاتێکی ناشەرعیدا.

سێیەم: ئەرکی سەرشانی خەڵکی ڕەنجدەر و تێکۆشەری کوردستانە خۆ بەخۆ و لە ڕێگای خۆ ڕێکخستنەوە، پارێزگاری لە شوێن و کەرەستە و دامەزراوە گشتییەکان بکەن و هەموو کەلوپەل و دۆکومێنتە هەستیارەکانیان بپارێزن، کە بەتەنیا ئەم ڕەفتارە خۆمان دڵنیا دەکاتەوە کە هەموو پێکەوە دەتوانین سیستەمێکی باشتر بهێنینە سەرکار.

چوارەم: ئەرکی سەرشانی چالاکەوان و ڕابەرە نیوەندییەکانی ناو خەڵکە مل بە بێسەرەوبەرەیی نەدەن و خەمسارد نەبن لە سەپاندنی داواکانی خەڵك و کەمتەرخەمی لە خۆ ڕێکخستندا نەکەن. کۆمەڵگا لۆکاڵی و محەللییەکان دەتوانن خۆیان ڕێکبخەن لە گرۆی بچووك بچووکدا؛ بەپێی گەڕەك و ناوچە، بەپێی پیشە و شوێنی کار، بە پێی ئارەزوومەندی و تیپ و ڕێکخراوە میللیەکان و خۆیان چۆنیان پێ خۆشە و بە باشی دەزانن. هەمیشە لەو گرۆبەندیانەدا دەتوانن یەکێتی بڕیار بدەنە دەست زانا و لێهاتوەکانیان و ئەگەر گرۆیەك لە خەڵك کۆك نەبوون لەسەر کەسێك یان چەند دانەیەك کە ڕابەری خۆبەڕێوەبردن بکەن، ئەوا دەتوانن یاسای دانایانەی بە تەمەنترین ڕابەریی پێڕەو بکەن تا دەچینە قۆناغێکی ترەوە لە سەرکەوتن. ئەمڕۆ ڕۆژی ئەوەیە خەڵك بە لێبوردن لە خواستە زۆر تایبەتەکانیان لەسەر چەند بنەمایەك کۆك و تەبابن:

١. لە پێناوی ڕێکنەکەوتن لەسەر پرسە زۆر تایبەت و وردەکان، پرسە گەورە و گشتییەکان ناکرێت ببنە قوربانی.

٢. هەموو هەوڵبدەین ئاستی لێبوردەییمان بەرامبەر بە یەکتری بگەیەنینە لووتکە و سەرکەوتنی ئەویترمان بە سەرکەوتنی خۆمان بزانین. نووسین و وتار و قسە و کاری جوانی یەکتری بە دەستکەوتی گەورەی خۆمان بزانین و پشت بکەینە خۆپەرستی و خۆبەزلزانی و ڕکابەری و ململانێی بێهوودە.

٣. سووربین لەسەر ڕاماڵینی ئەم دەسەڵاتە و گەیاندنی تاوانبارەکانیان بە دادگایەکی ڕەوا کە سبەی ڕۆژ خەڵك بە گشتی بڕیاری لێ بدات.

٤. بە هۆشیارییەوە گوێ بۆ یەکتری بگرین و لە پرانسیپە گشتییەکان لانەدەین کە دەمانبەن بەرەو سەرکەوتن و چاککردنی ژیان لە کۆمەڵگاکەماندا.

٥. هەمیشە لە بیرمان بێت کە ڕاپەڕین و خۆپیشاندان و پشێوییەکان بۆنە نین بۆ خۆ دەوڵەمندکردن و پۆزلێدان و تۆڵەکردنەوە، بەڵکو دەرفەتی مێژووین بۆ دادگایی کردنی تاوانباران و هێنانە سەرکاری ژیانێکی باشتر گەڕاندنەوەی شکۆ بۆ خۆمان و هاوڕی و هاونیشتمانییەکانمان.

٦. پشتیوانی و هاوپشتی گەڕەك و ناوچە جیاوازەکانی کوردستان زامنی زیاتری سەرکەوتنن، بۆیە دوورکەوتنەوە لە گیانی خۆخۆیی و ڕێگەنەدان بە سووکایەتی و درووستکردنی کەلێن لە نێوانتاندا دەبێتە یەکێك لە هەرە گورزە کاریگەرەکان بۆ سەر دەسەڵاتی ستەم و هاڕەکردنی یەکجاری و کۆتایی.

لە کۆتاییدا سەرکەوتنی خێرا و سەقامگیربوونەوەی کوردستان، لە ڕیگای چارەسەری موچە و خێرایی دەستکەوتە کورتمەوداکانەوە نابێت، بەڵکو لە زوو چارەسەرکردنی سیستەمی حوکمڕانی و دوورخستنەوەی ستەمکارە خۆسەپێنەکاندایە. بەهێزبوونەوەی ناوخۆی کوردستان دەرفەتی زیاترمان دەداتێ تا لە پەیوەندییە دەرەکییەکانماندا خاوەن شکۆ و کەرامەت و داوای ڕەوای خۆمان بین. سەرکەوتنیش تەنیا لەڕیگای خۆڕێکخستن و دوورکەونتەوە لە فەوزا و بێ سەرەوبەرییەوە دەبێت. بۆ ئەمڕۆی خۆپیشاندانەکان و ڕاپەڕین، ڕابەرە دلسۆز و جەماوەرییەکانتان پشتگیری بکەن و ڕێگەمەدەن خەڵکی زمان لووس و بەرژەوەندی خواز لە نیوتاندا خۆیان وەك ڕابەر و ڕێنماییکار بسەپێنن. جارێکی تر قبوڵ مەکەن سەرانی دزی و تاڵانچێتی و ئەزموونی شکست خۆیان بکەنەوە بە دەمڕاست و بێنەوە پێش بۆ بەخەساردانی  دەستکەوتەکانی مێژوویەکی ترتان.

بۆ پێشەوە بەرەو سەرکەوتن، هەمیشە جەماوەری هۆشیار دەتوانێت نەخشی خۆی بدات لە ڕووداوەکان، ئەگەرچی بە خواستی ئەوانیش ڕووداوەکان سەرپێی شەقامەکان نەکەوتبن.